Baumanns Fechtbuch

Codex Wallerstein Teil I

“Baumanns Fechtbuch”, ca. 1470.

Inhalt:

• foll. 3-1, 21: langes Schwert (26 Bilder)
• foll. 22-28 Dolch (14 Bilder)
• foll. 29-32 Messer (8 Bilder)

langes Schwert

 

3r	3v	4r	4v	5r	5v
6r	6v	7r	7v	8r	8v
9r	9v	10r	10v	11r	11v
12r	12v	13r	13v	14r	14v
21r	21v

 

1. [3r] leng

Item so du mit ainem vichst und zu im kummst an das swert das ir paid anhapt ?gepuch so reck dein arm und dein swert lanck von dir und secz dich mit dem leib under in dy wag und sich dazu leng und mass in dem swert habst so magstu arbaiten und weren alles das das notturft ist dy leng das ist dastu hinter deinem swert stest und rechst dich dy mass ist dastu nider stest als hie gmalt stet und mach dich klain mit dem leib so pistu gros im swert

[PHM: der stent im langen schwert stendt 24 bar]

2. [3v] mass

 

Item alstu ainem an pinczt an das swert so slach im lanck ein mit dem ort zu dem gesicht und wint im mit der langen sneid ein in das angesicht als hie gmalt stet so magstu im ain reissen mit dem knopf oder mit gewappneter hant in das gesicht stossen

3. [4r] swech

Item so du ainem an pinczt an das swert so wart ob er waich oder hert sey ist er hert so wint in in das an gesicht als vor geschiben stet ist er aber waich so such dy swech seins swerts und wint im über auf dein lenke saiten als hie gmalt stet so magstu im nach dem kopf snappen und dy pless suchen

4. [4v] sterck

 

Item haustu ainem oben ein in das swert und er helt starck wider so var auf in dy höch mit deinem swert hinder sich an seinem swert gegen seinen swech und das dein gehilcz an seinem swert stee und wint im dy kurcz sneid an den hals als hie gmalt stet so magstu in mit gewalt auf dy erden ziechen

5. [5r] vor

 

Item so du ainem in das swert pinczt und er slecht dir starck ein zu dem kopf so versecz im mit der kurczen sneid und dring in in so muss er slachen slecht er den zu der anderen seiten so lege im dein swert auf sein lencke agssel als hie gmalt stet so slechstu in an ein or das haist ein gelegt und und haist var

6. [5v] nach

 

Item so dir ainer oben starck ain haut so wart und versecz im den haw mit der kurczen sneid ist er dan also pehaut und haut er wen du im ain magst legen so lass in frey hawen und vall im mit der kurczen sneid auf sein swert als hie gmalt stet so pincztu in und slechsst in an das or und ?gefinsich

7. [6r] füln ynndes

 

Item so dir ainer in das swert pint und will dir in das an- gesicht vinden oder ander kunst treiben so wint auch auf und gee reschlich fürsich in in und als pald er etwas arbaitten will so vall im starck in sein arm und stosz in zuruck als hie gmalt stet so wurfstu in an den rucken

8. [6v]

Item so du ainem anpinczt und er wint dir ein zu dem gesicht so wint im auch ein und stee vest in dem winden und empfind an seinem swert als so dastu in nit von deinem swert last komen das er zu kainer arbait mag kommen das ist die grösst mass dez swercz und stee starck in der wag als gmalt stet

9. [7r]

Item pincztu ainem in das swert und er wint dir ein zu dem gesicht mit seiner kurczen sneid so wint auch hoch auf in dy höch und wen er auf vert und wil das verseczen so haw im einen verzuckten haw nach seiner elpogen alz hie gmalt stet

10. [7v]

Item. so du ainem nach dem elpogen hast gehawen als da hinden gmalt stet verseczt er denn den haw so stoss im sein swert under mit deinem gehilcz und vall im mit dem knopf und mit paiden armen über und leg im dy kurcz sneid nachdem an den hals und zeuch in als hie gmalt stet

11. [8r]

Item mer ein stuck wen du im nach dem elpogen slechst und er verseczt deinen haw so pleib sten mit deinem swert an dem seinen und trit für mit dem rechten fusz als welstu im zu der anderen seiten slachen und schneid in auf nach seinem lencken armen als hie gmalt stet das haist die ausser ?mynn

12. [8v]

Item mer ein solichs stuck wen du im nach dem elpogen slechst verseczt er denn den slag so var hoch auf mit deinen paiden henden und lassz dein lencke hant varen und vall im über ein paid arm und slache hinter dein lencke seiten und stich mit deinem swert zvischen dien dein und sein durch und leg im das swert an den hals als her gmalt stet so prich- stu im den arm ab und sneist im den hals ab

13. [9r]

Item dir ainer dein swert also hinter sein lenck ?veryssen gevangen hat und wil dich slachen oder {stechen} stechen so fleuch hiner in auf seinen slag und vall mit deiner lencken vorn in dein swert und wint in herfür als hie gmalt stet so prechstu im den arm ab

14. [9v]

Item so dir ainer aber an dein swert pint so wint im dy kurcz sneid nach dem angesicht ein und gee inndes und trit für mit dem lencken fussz und vall im mit deinem knopf über sein hent und vach dein klingen in dein lencke hant und leg ims an den hals als hie gmalt stet so würffstu in auf den rucken

(Dy geschrift gehört zu dem anderen stuck davorn)

15. [10r]

Item so dir ainer nach dem elpogen hat geslagen und vächt dir dein swert mit seiner lencken hantt also vor und wil zvischen dir und im durch stechen nach deinem hals als vor so vach sein swercz klingen in dein lencke hant und leg ims selb an seinen hals als da hie gmalt stet und hinter trit ain so würffstu in auf den rucken

(Dy geschrift gehört an das hinter stuck und iene gehört her über)

16. [10v]

Item so dir iner an das swert pintt und wint dir in das angesicht so wint auch und lassz den knopf varn als vor und val im über und hinter trit in und leg im das swert an das haupt als hie gmalt stet so würfstu in auf den rucken

17. [11r]

Item wint dir ainer ein in das gesicht so greif pald mit deiner lencken hant un dein swercz klingen und stich über sein swert ein zu seiner hoden d also hie gmalt stet das ist gar ein gucz mannhafcz stuck.

18. [11v]

Item ein gutz swert nemen wen dir ainer oben an pint an das swert so wint auf mit der kurczen sneid und gee vast punded in in und greif mit deiner lincken hant in sein pint zvischen seiner hent und gee mit den knopf über sein klingen und stoss ein gegen dem maul als hie gmalt stet so nimstu im das swert

19. [12r]

Item ein anders swert nemen wen dir ainer an pint und will dir ein winten zu dem gesicht so greiff pald mit deiner lencken hant in paid swercz klingen und zeuchs auf dein lencke seiten und gee mit deinem gehilcz unden an sein hand und dauch übersich als hie gmalt stet so nymstu im das swert

20. [12v]

Item gar ein gucz verporgens stuck für einen weidlichen starcken mann wen dir ainer in das swert pint und wil dir ein wintten oder stechen so wint auch vast auf und gee mit der kurczen sneid starck an sein swert und gib im einen grossen stossz mit peiden henden für sich an als so kert er sich vor dir und so slach in auf den kopf als hie gmalt stet

21. [13r]

Item mer ain gucz swert nemen wen dir ainer an pint an das swert so var im pald mit deiner rechten hant in sein swert zvischen seiner paider hentt in das pint und zeuch an dich scheub mit deiner lencken mit dem creutz sein swert an weg und stossz in mit dem knopf in das maul als hie gmalt stet

22. [13v]

Item mer ein swert nemen wenn dir ainer an pintt und will dir in das gesicht winden so pleib stenn in der langen sneid und var hoch auf und var im mit dem knopf zvischen seiner hent ein und mit der lencken hant vassz dein klingen und wint im an den kopff als hie gmalt stet

23. [14r]

Item mer ein swert nemen wenn dir ainer an das swert pint so pint in auch starck ein und dauch in hinder sich in rucken und lassz dein lencke hant varen und greif in über seinen rechten arm in das swert zvischen seiner hent und zeuch hindersich als hie gemalt stet

24. [14v]

Item ein gut stuck wenn dir ainer an das swert pint so wint im reschlich ein und val mit dem knopff über und greif mit der lencken hant in dein klingen und trit mit dem lencken fusz hinder in und leg ims swert an hals und zeuch in am rucken und stichs swert in in als hie gmalt stet

25. [21r]

Item ein gucz stuck fur einen starcken man wenn du mit ainem an pinczt an das swert so thu als welstu im in das anesicht winden und stossz mit deinem creucz vast an sein swert und var hoch auf und lassz dann dein swert vallen ?uf dein haupt und vall im unden um paid füsz als hie gmlt stet so wurffstu in

26. [21v]

Item ein gancz swert nemen wenn dir ainer an das swert pint so vall im mit deiner lencken hant in paid swercz klingen und gee mit dem knopf und mit der rechten hant unten durch sein swert und zeuch hindersich als hie gmalt stet so nymstu im das swert etc.

Dolch

22r	22v	23r	23v	24r	24v
25r	25v	26r	26v	27r	27v
28r	28v

 

1. [22r]

Item sticht dir ainer mit einem degen oben ein zu dem gesicht so var auf mit deiner äbichen lencken hant unden an seinen arm und reib in denn arm {und} und tu alss welstu in mit deinem degen in den hals stechen und stich in über seinen arm als hieg gmalt stet und zeuch so precht im der arm ab

[PHM: Im dolchen stendt der stent inn als 14 bar]

2. [23r]

Item sticht dir ainer oben zu dem gesicht so vass deinen degen auf deine rechte hant und ?wer auf da mit und vach den stich dar auf und greiff mit deiner lencken hant an seinen elpogen und heb auf als hie gmalt stet so prechstu im den arm und nymst im den degen

3. [23v]

Item sticht dir ainer zu dem gesicht so nym den degen auf deinen rechten arm und vach den stich dar aud und wint in mit deiner spicz über seinen arm und zeuch an dich als hie gmalt stet so nymstu im den degen oder du prichst im den arm ab

4. [24r]

Item sticht dir ainer oben zu den gesicht so stich mit deinem degen von unden auf mit abrechd hand umb einen rechten arm und var mit deiner lencken hand vor an spicz und zeuch nider zu der erd als hie gemalt stet so helcztu in mit gewalt wildu ledig wachen so nym deinen degen in dy lencke hant und stich in

5. [24v]

Item sticht dir ainer oben ein zu dem gesicht so vassz deinen degen in paid hent und mach dein stich dar auf und wint ain den knopf über seinen rechten arm als hie gmalt stet so slechstu im seinen degen in das angesicht

6. [24v]

Item sticht dir ainer oben ein zu dem gesicht so vassz deinen degen in paid hent als vor und vach den sthi stich dar auf und lauf vast hindersich zuruck mit im und dauch yemen über seinen kopf an dem hals als hie gemalt stet so zeuchstu in auf dy erden

7. [25r]

Item stecht dir ainer zu dem gesicht so vach denn stich alz vor und lassz dein lencke hant und fass im seinen rechten arm und reib in vor dir nider gegen deiner rechten seiten und ?verburff den degen und stich im über sein agssel und zeuch in an an dich und reib im den arm auf den rucken als hie gmalt stet so pincztu in mit dem degen

8. [25v]

Item stecht dir ainer oben zu dem gesicht so vassz deinen degen auf den rechten arm und vach den stich dar ein und stosz in mit der lencken hant an deinen elpogen von dir das er sich vor dir umker und fasz in pey einem fusz mit deinem degen alz hie gemalt stet so würffstu in

9. [26r]

Item stet ainer gegen dir mit ainem degen und thu hast sorg auf in so lauf gar sünstlich auf in und thu sann welstu in oben in das gesicht stechen und ker dich vor im umb auf dein rechte seiten und stich in unden zu den hoden as hie gmalt stet

10. [26v]

Item sticht dir ainer oben zu dem gesicht so slach in mit deiner lencken hant aussen au fsein rechten hant so sticht er sich selb in dy hoden und stich in dann mit deinem degen oben ein zu dem hals als hie gmalt stet

11. [27r]

Item sticht dir ainer unden zu dem pauch denn walsthu stich so vassz deinen degen in paid hent und vall im oben auf seinen degen und vassz mit deiner lencken hant sein rechten und ker dich reschlich und var im und zeuch in über die agssel so prichstu im den arm ab

12. [27v]

Item sticht dir ainer udn zu dem pauch so vassz dein degen in paid hent und vall im auf den stich und treib in mit deinem degen gegen deinen rechten seite und heb übersich auf in dy höch als hie gmalt stet so wincztu im den degen aus der hant

13. [28r]

Item sticht dir ainer oben ein zu dem gesicht so var auf mit deiner äbichen lancken hant und prich im den stich ausz und stich im mit deinem degen zvischen der pain und heb in auf als hie gmalt stet so wurffstu in auf den rucken

14. [28v]

Item sticht dir ainer mit dem langen degen nach der prust als franczoschisch so var auf mit deiner lencken äbichten hant unten an deinen degen und leg im seinen degen auf seinen rechten arm und prich im den degen darüber ausz als hie gmalt stet

Messer

29r	29v	30r	30v	31r	31v
32r	32v

1. [29r]

Item vichtstu mit ainem mit dem messer haut er dir oben ein so versechcz mit deinem messer, aussen mit der fläch auf den nagel und gee pald fürsich mit dem lencken fuss und vall im mit dem knopf über seinen arm als hie gmalt stet so haustu in in den kopf.

[PHM: Im dussecken stendt der stent inn als 8 bar]

2. [29v]

Item mer ein gucz stuck haut dir ainer zu von oben nider so vach den slag auf den nagel als vor und gee mit dem lencken fusz inndes und stossz in mit deiner lencken hant sein rechte ander zu der erde und haw in uber den kopff als hie g[ma]lt stet.

3. [30r]

Item ein gucz stuck haut dir ainer oben zu dem kopf so wint im mit deinem messer unten durch und vach den straich dar auf und vall im mit dem knopf über seinen arm und reissz an dich und trit zu mit dem lencken fusz und var im mit der lencken hant umb den hals als hie gmalt stet so wurfftu in auf den rucken

4. [30v]

Item mer ein gucz stuck wen ainer ober nider haut so wint unden durch mit deinem messer und lauf im ein und var mit deiner lencken hant hoch über sein rechten arm und vassz hinter das ?ügssen und stich mit deinem messer zvischen dir und im durch an seinen hals als hie gemalt stet /

5. [31r]

Item haut dir ainer oben ein zu dem kopf so versecz aber mit der fläch und auf den nagel und ?dauch im sein messer an wege das er slachen müsse und wen er den slachen will so such die ?nachent und zeuch im den arm ab alz hie gmalt stet /

6. [31v]

Item ein anderssz stuck für einen starcken haut dir ainer starck oben ein so vassz dein messer zu gewap- noter hant und vach den straich dar ein und trit zu im mit deinem lencken fusz und leg im das messer an den hals als hie gemalt stett /

7. [32r]

Item haut dir ainer oben ein zu dein gesicht so var auf mit gewapnoter hant und vach den slag in das messer und wint im dem knopf über seinen arm und reissz hindersich als hie gmalt stet so prichstu im den arm oder nymstu im das messer

8. [32v]

Item haut dir ainer oben ein zu dem kopf so var auf mit gewapnoter hant und vach den straich in dy klingen als vor und trit vast hinter in mit deinem rechten fusz und leg im den knopf an den hals als hie gemalt stet so würffstu in an den rucken